ବହୁଚର୍ଚ୍ଚିତ ଅଭିନେତ୍ରୀ ନିକିତା ହତ୍ୟା ମାମଲାରେ ପଡିଛି ପୂର୍ଣ୍ଣଛେଦ । 6 ବର୍ଷ ହେବ ଗୁମୁରି ଗୁମୁରି କାନ୍ଦୁଥିଲା ତାଙ୍କ ଆତ୍ମା । କେବେ ତାଙ୍କ ନୃଶଂସ ସ୍ୱାମୀଙ୍କୁ ଦଣ୍ଡ ମିଳିବ । ହେଲେ ଆଜି ତାଙ୍କୁ ମିଳିଛି ନ୍ୟାୟ । ଅଭିଯୁକ୍ତ ସ୍ୱାମୀକୁ ଆଜୀବନ କାରାଦଣ୍ଡାଦେଶ ଶୁଣାଇଛନ୍ତି କଟକ ଏଡିଜେ-୩ କୋର୍ଟ । ଏବେ ଜେଲରେ ଦିନ କାଟିବେ ନିକିତାଙ୍କ ସ୍ୱାମୀ ଲିପନ ସାହୁ । ଆଉ ନିଜ ଭୁଲର ପଶ୍ଚାତାପ କରିବେ। କିନ୍ତୁ ଏହି ମାମଲାରେ ଲିପନର ବାପା ଓ ମାଆ ଖଲାସ ହୋଇଛନ୍ତି । ୨୦୧୯ରେ ନିଜ ଘର ଛାତରୁ ପଡ଼ି ନିକିତାଙ୍କ ମୃତ୍ୟୁ ହୋଇଥିଲା । ପରେ ଆଇପିସି ଧାରା ୩୦୨ରେ ହତ୍ୟା ମାମଲା ରୁଜୁ ହୋଇଥିଲା । ସ୍ବାମୀ ଓ ଶାଶୁ ଶ୍ବଶୂର ହତ୍ୟା କରିଥିବା ନେଇ ଅଭିଯୋଗ ହୋଇଥିଲା ।
୨୦୧୬ ମସିହାରେ ଅଭିନେତ୍ରୀ ଲକ୍ଷ୍ମୀପ୍ରିୟା ବିଶ୍ୱାଳ ଓରଫ ନିକିତାଙ୍କୁ ବିବାହ କରିଥିଲେ ଲିପନ କିନ୍ତୁ ବିବାହର କିଛି ଦିନ ପରେ ନିକିତାଙ୍କ ଉପରେ ଉଭୟ ଶାରୀରିକ ଓ ମାନସିକ ଅତ୍ୟାଚାର କରୁଥିଲେ ଲିପନ। ନିକିତାଙ୍କ ଫିଲ୍ମରୁ ମିଳୁଥିବା ପାରିଶ୍ରମିକ ଯେତିକି ରହିଥିଲା ତାହାଠୁ ଅଧିକ ଆବଶ୍ୟକ କରି ତାଙ୍କୁ ଅତ୍ୟାଚାର କରୁଥିଲେ ଶାଶୂଘର ଲୋକେ । ସେ ଗର୍ଭବତୀ ହେବା ପରେ ମାନସିକ ଶାନ୍ତି ପାଇବା ପାଇଁ ଭୁବନେଶ୍ବର ଏକ ଭଡାଘରେ ରହୁଥିଲେ । ୩ ମାସ ପରେ ଆର୍ଥିକ ଅନାଟନ ଦୃଷ୍ଟିକୋଣରୁ ଭଡା ଘର ଛାଡ଼ି ନିଜ ଘରକୁ ଫେରିଥିଲେ ନିକିତା କିନ୍ତୁ ତାଙ୍କ ଉପରେ ପୂର୍ବ ପରି ଅତ୍ୟାଚାରରେ ବ୍ରେକ ଲାଗି ନଥିଲା, ବରଂ ଅଧିକ ବଢିଥିଲା । ୨୦୧୮ରେ ଏକ ଶିଶୁ ପୁତ୍ରକୁ ଜନ୍ମ ଦେବା ପରେ ସ୍ୱାମୀଙ୍କ ସହ ଶ୍ୱଶୁର ଘରକୁ ଯାଇଥିବା ବେଳେ ସେଠାରେ ବାଦ ବିବାଦ ହୋଇଥିଲା ।
୨୦୧୯ ଜାନୁଆରି ୪ରେ ଛାତରୁ ଖସି ପଡ଼ି ଗୁରୁତର ହୋଇଥିଲେ ନିକିତା। ଆଉ ୫ରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଥିଲା । ସ୍ୱାମୀ ଲିପନ ଛାତରୁ ଠେଲି ନିକିତାଙ୍କୁ ହତ୍ୟା କରିଥିଲେ । ଯାହା ଆଜି ପ୍ରମାଣିତ ହୋଇଛି । ନିକିତାଙ୍କ ଆତ୍ମାକୁ ଶାନ୍ତି ମିଳିଛି ।
