ଆଜି ଚୈତ୍ର ମାସର ପ୍ରଥମ ମଙ୍ଗଳବାର.. ଆରମ୍ଭ ହୋଇଛି ଗଞ୍ଜାମ ଜିଲ୍ଲାର ଅଧିଷ୍ଠାତ୍ରୀ ଦେବୀ ମାଁ ତାରାତାରିଣୀଙ୍କ ଚୈତ୍ର ଯାତ୍ରା | ମାଆଙ୍କ ଦର୍ଶନ କରିବା ପାଇଁ ଭକ୍ତଙ୍କ ପ୍ରବଳ ଭିଡ ଦେଖାଦେଇଛି | ମା ତାରାତାରିଣୀ ମହାକାଳୀ ବେଶରେ ଭକ୍ତଙ୍କୁ ଦର୍ଶନ ଦେଉଛନ୍ତି .| ହୁଳୁହୁଳି, ଶଙ୍ଖ, ଘଣ୍ଟରେ କମ୍ପୁଛି ରତ୍ନଗିରି ପାହାଡ | ମା’ଙ୍କ ପୀଠରେ ସ୍ୱତନ୍ତ୍ର ରୀତିନୀତି ଅନୁଷ୍ଠିତ ହୋଇଛି | ଭୋର ୪ଟା ସମୟରେ ଗଞ୍ଜାମ ଜିଲାପାଳ ଭି.କୀର୍ତ୍ତୀ ଭାସନ ଓ ତାଙ୍କ ପତ୍ନୀ ମନ୍ଦରରେ ପହଞ୍ଚି ପୂଜାର୍ଚ୍ଚନା କରି ପଞ୍ଚାମୃତ ହାଣ୍ଡିକୁ ମୁଣ୍ଡାଇ ବେଢା ପରିକ୍ରମା କରିଥିବା ବେଳେ ଜିଲାବାସୀଙ୍କ ମଙ୍ଗଳ କାମନା କରିଥିଲେ ଜିଲାପାଳ |
ମଧ୍ୟରାତ୍ରିରୁ ମା’ଙ୍କ ସ୍ନାନ, ମାର୍ଜନା ଓ ମହାମାୟା ବେଶ ସମ୍ପନ୍ନ ହେବା ପରେ ଭକ୍ତଙ୍କ ପାଇଁ ସାହାଣମେଲା ଦର୍ଶନ ଆରମ୍ଭ ହୋଇଥିଲା | ପ୍ରଥମ ମଙ୍ଗଳବାର ହୋଇଥିବାରୁ ମା’ଙ୍କୁ ସୁନା ବେଶରେ ସଜ୍ଜିତ କରାଯାଇଛି | ଯାହା ଶ୍ରଦ୍ଧାଳୁଙ୍କ ମନ ମୋହି ନେଉଛି | ପ୍ରଶାସନ ପକ୍ଷରୁ ଶ୍ରଦ୍ଧାଳୁଙ୍କ ସୁବିଧା ପାଇଁ ବ୍ୟାପକ ବ୍ୟବସ୍ଥା କରାଯାଇଛି | କିପରି ଭକ୍ତମାନେ ଶାନ୍ତି ଶୃଙ୍ଖଳାରେ ଆସି ମା’ଙ୍କ ଦର୍ଶନ କରିପାରିବେ, ମାନସିକଧାରୀମାନେ ମୁଣ୍ଡନ କରିବେ, ସେଥିନେଇ ଅସ୍ଥାୟୀ ବସଷ୍ଟାଣ୍ଡ, ପାହାଡ ଉପରକୁ ଯିବାଲାଗି ସ୍ବତନ୍ତ୍ର ବସ, ରୋପୱେର ବ୍ୟବସ୍ଥା, ପାନୀୟ ଜଳ, ଆଦି ବିଭିନ୍ନ ବନ୍ଦୋବସ୍ତ କରାଯାଇଛି |
ରାଜ୍ୟ ସରକାରଙ୍କ ପକ୍ଷରୁ ମା’ ତାରାତାରିଣୀ ପୀଠର ନବକଳେବର କରାଯିବା ପରେ ଚଳିତ ବର୍ଷ ଯାତ୍ରାର ଶୋଭା ଆହୁରି ଦ୍ୱିଗୁଣିତ ହୋଇଛି | ଭକ୍ତଙ୍କ ବିଶ୍ରାମ ପାଇଁ ସ୍ୱତନ୍ତ୍ର ସେଡ୍, ପାନୀୟ ଜଳ ଏବଂ ସୌନ୍ଦର୍ଯ୍ୟକରଣ କାର୍ଯ୍ୟ ଯୋଗୁଁ ଯାତ୍ରୀମାନେ ଶାନ୍ତିପୂର୍ଣ୍ଣ ଭାବେ ମା’ଙ୍କ ଦର୍ଶନ କରିପାରୁଛନ୍ତି | ସବୁ ମଙ୍ଗଳବାରରେ ଏହି ଭିଡ଼ ଆହୁରି ବଢ଼ିବାର ସମ୍ଭାବନା ରହିଛି | ଏହାକୁ ନିୟନ୍ତ୍ରଣ କରିବା ଲାଗି ୨ ଜଣ ଅତିରିକ୍ତ ଏସପି,୪ ଜଣ ଡିଏସପି, ୧୫ ଜଣ ଇନ୍ସପେକ୍ଟର,୧୧୨ ଜଣ ଏସଆଇ,ଏଏସଆଇ,୨୫୦ ହୋମଗାର୍ଡ,୧୫୪ ଓପିଏଫ, ୧୧ ଜଣ ହାବିଲଦାର ଓ ୧୩ ପ୍ଲାଟୁନ ଫୋର୍ସ ମୁତୟନ ହୋଇଥିବାବେଳେ ବହୁ ସ୍ବେଚ୍ଛାସେବୀ, ବାରିକ ନିୟୋଜିତ ହୋଇଛନ୍ତି | ମା’ଙ୍କ ଚୈତ୍ର ଯାତ୍ରା କେବଳ ଏକ ଧାର୍ମିକ ଉତ୍ସବ ନୁହେଁ, ବରଂ ଏହା ଗଞ୍ଜାମ ଜିଲ୍ଲାର ସଂସ୍କୃତି ଓ ପରମ୍ପରାର ଏକ ଅନନ୍ୟ ପ୍ରତୀକ | ଭକ୍ତଙ୍କର ବି ଅଗାଢ଼ ବିଶ୍ୱାସ ରହିଛି | ଯାହାଫଳରେ ବହୁ ଦୂରଦୁରାନ୍ତରୁ ଆସି ମାଆଙ୍କ ଦର୍ଶନ କରୁଛନ୍ତି |
