କଟକ ବଡ଼ ମେଡିକାଲ୍ ରେ ବଡ଼ ଅବ୍ୟବସ୍ଥା। ମେଡିକାଲ୍ ICU ରେ ବି ଅସୁରକ୍ଷିତ ରୋଗୀ। ବେଡ୍ ରୁ ତଳକୁ ଖସିଗଲେ ବି ଦେଖିବାକୁ ନାହିଁ କେହି। ଆଜ୍ଞା ହଁ ! ବିଲକୁଲ୍ ସତ ଘଟଣା | କଟକ SCB ମେଡିକାଲ୍ ICU ରେ ରୋଗୀ ସିନା ଚିକିତ୍ସିତ ହେଉଛନ୍ତି ହେଲେ ସେମାନଙ୍କୁ ଦେଖିବାକୁ କେହି ଯେମିତି ନାହିଁ। ବିନା ମାଆ ବାପାରେ ଚାଲିଛି ଚିକିତ୍ସା। ମୋବାଇଲ୍ ରୁ ମୋବାଇଲ୍ କୁ ଭାଇରାଲ୍ ହେଉଥିବା ଏଇ ଭିଡିଓ କୁ ଭଲ ଭାବେ ଦେଖନ୍ତୁ। କେମିତି ICU ବେଡ୍ ରୁ ତଳକୁ ଖସି ଯାଉଛନ୍ତି ରୋଗୀ। ତା ପୁର୍ବରୁ ଛଟପଟ ହେଉଛନ୍ତି,ପାଟି ନଖୋଲିଲେ ବି ସହାୟତା ମାଗୁଛନ୍ତି କିନ୍ତୁ ନା କେହି ଅଛି ଦେଖିବାକୁ ନା କିଏ ଅଛି ସାହାଯ୍ୟ କରିବାକୁ।
ଭିଡିଓ ଭାଇରାଲ୍ ହେବା ପରେ ଲୋକଦେଖାଣିଆ କାର୍ଯ୍ୟାନୁଷ୍ଠାନ ନେଇଛନ୍ତି କର୍ତ୍ତୃପକ୍ଷ। ସେଇ ICU ରେ ଥିବା କର୍ମଚାରୀଙ୍କୁ ଦାୟିତ୍ଵରୁ ହଟାଇଛନ୍ତି। ହେଲେ କଣ ଏତିକିରେ ହବ? କିଏ ଦାୟିତ୍ଵରେ ଥିଲେ, କିଏ କାମ କରୁନଥିଲେ ସେ କଥା କେହି ଜାଣି ନାହାଁନ୍ତି। ଏଇ ଗୋଟାଏ ଘଟଣା ନୁହେଁ ଏମିତି ଅନେକ ଦୁର୍ନାମ ମୁଣ୍ଡେଇ ଚାଲିଛି କଟକ ବଡ଼ ମେଡ଼ିକାଲ। ଆଉ ଆଇସିୟୁ ଭିତରେ ରୋଗୀ ଅବହେଳାର ଏ ନଗ୍ନ ଚିତ୍ର ସାମ୍ନାକୁ ଆସିବା ପରେ ଦାୟିତ୍ବରେ ଥିବା ଡାକ୍ତର- ନର୍ସ ଓ ଆଟେଣ୍ଡାଣ୍ଟଙ୍କ ଖାମଖିଆଲି ପଣିଆ ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି |
ସରକାର ବିଶ୍ବସ୍ତରୀୟ ହସ୍ପିଟାଲ୍ ପାଇଁ ଯୋଜନା ରଖିଛନ୍ତି, କଣ ଏଇ ଅବସ୍ଥାରେ ହେବ ବିଶ୍ବସ୍ତରୀୟ ?
