‘ଓଡ଼ିଶାରେ କୋଭିଡ୍‌ ପରିସ୍ଥିତି ଚିନ୍ତାଜନକ ନୁହେଁ’

ଗଞ୍ଜାମ ଜିଲ୍ଲାରେ କୋଭିଡ୍‌ ପଜିଟିଭ୍‌ ଚିହ୍ନଟ ହୋଇଥିବା ଖବର ପ୍ରକାଶ ପାଇବା ପରେ ରାଜ୍ୟରେ କୋଭିଡ୍‌ ପରିସ୍ଥିତିକୁ ନେଇ ଜନସ୍ୱାସ୍ଥ୍ୟ ନିର୍ଦ୍ଦେଶକ ଡା. ରବୀନ୍ଦ୍ରନାଥ ମିଶ୍ର ସ୍ପଷ୍ଟୀକରଣ ଦେଇଛନ୍ତି। ସେ କହିଛନ୍ତି ଯେ, ରାଜ୍ୟରେ ଚିନ୍ତାଜନକ କିମ୍ବା ଗୁରୁତର କୋଭିଡ୍‌ ପରିସ୍ଥିତି ନାହିଁ ଏବଂ ଲୋକମାନେ ଅନାବଶ୍ୟକ ଭାବେ ଆତଙ୍କିତ ହେବାର କୌଣସି କାରଣ ନାହିଁ।

ଡା. ମିଶ୍ରଙ୍କ କହିବା ଅନୁଯାୟୀ, ବର୍ତ୍ତମାନ କୋଭିଡ୍‌ ସଂକ୍ରମଣ ସାଧାରଣ ଥଣ୍ଡା, କାଶ ଓ ଜ୍ୱର ଭଳି ଲକ୍ଷଣରେ ସୀମିତ ରହୁଛି। ଅଧିକାଂଶ ରୋଗୀଙ୍କ ଠାରେ ଗୁରୁତର ଲକ୍ଷଣ ଦେଖାଯାଉ ନାହିଁ ଏବଂ ଚିକିତ୍ସା ପରେ ସେମାନେ ସୁସ୍ଥ ହେଉଛନ୍ତି।

ସେ ଆହୁରି କହିଛନ୍ତି ଯେ, ଗଞ୍ଜାମରେ କୋଭିଡ୍‌ ସଂକ୍ରମଣ ସମ୍ପର୍କିତ ସୂଚନା ଗଣମାଧ୍ୟମ ମାଧ୍ୟମରେ ଜଣାପଡ଼ିଛି। ସ୍ୱାସ୍ଥ୍ୟ ବିଭାଗ ଘଟଣା ଉପରେ ନଜର ରଖିଛି ଏବଂ ଆବଶ୍ୟକ ପଦକ୍ଷେପ ଗ୍ରହଣ କରୁଛି।

ବର୍ତ୍ତମାନ ମୋଟ ୩ ଜଣ କୋଭିଡ୍‌ ସଂକ୍ରମିତ ଚିହ୍ନଟ ହୋଇଥିବା ବେଳେ, ସେଥିମଧ୍ୟରୁ ୨ ଜଣ ଘରେ ସଙ୍ଗରୋଧରେ (Home Isolation) ରହିଛନ୍ତି ଓ ଜଣେ ହସ୍ପିଟାଲରେ ଚିକିତ୍ସାଧୀନ ଅଛନ୍ତି। ସମସ୍ତଙ୍କ ସ୍ୱାସ୍ଥ୍ୟ ଅବସ୍ଥା ସ୍ଥିର ଏବଂ ସେମାନେ ବିପଦମୁକ୍ତ ବୋଲି ଜନସ୍ୱାସ୍ଥ୍ୟ ନିର୍ଦ୍ଦେଶକ ସୂଚନା ଦେଇଛନ୍ତି।

ସେ କହିଛନ୍ତି ଯେ, ରାଜ୍ୟ ସରକାର କୋଭିଡ୍‌ ପରିସ୍ଥିତି ଉପରେ ନଜର ରଖିଛନ୍ତି। ଆବଶ୍ୟକ ସ୍ଥଳେ ନମୁନା ପରୀକ୍ଷା, ନିରୀକ୍ଷଣ ଏବଂ ଚିକିତ୍ସା ବ୍ୟବସ୍ଥା ଜାରି ରହିଛି। ତେଣୁ ଜନସାଧାରଣଙ୍କୁ ଭୟଭୀତ ନହୋଇ ସଚେତନ ରହିବାକୁ ପରାମର୍ଶ ଦିଆଯାଇଛି।

ସ୍ୱାସ୍ଥ୍ୟ ବିଶେଷଜ୍ଞମାନଙ୍କ ମତରେ, ଜ୍ୱର, କାଶ କିମ୍ବା ଶ୍ୱାସକଷ୍ଟ ଭଳି ଲକ୍ଷଣ ଦେଖାଦେଲେ ଡାକ୍ତରଙ୍କ ପରାମର୍ଶ ନେବା ସହ ସ୍ୱଚ୍ଛତା ବଜାୟ ରଖିବା, ଭିଡ଼ ସ୍ଥାନରେ ସତର୍କତା ଅବଲମ୍ବନ କରିବା ଏବଂ ଆବଶ୍ୟକ ହେଲେ ମାସ୍କ ବ୍ୟବହାର କରିବା ଉଚିତ। ବର୍ତ୍ତମାନ ପରିସ୍ଥିତି ନିୟନ୍ତ୍ରଣରେ ଥିବାରୁ ଅନାବଶ୍ୟକ ଗୁଜବକୁ ବିଶ୍ୱାସ ନକରି କେବଳ ସରକାରୀ ସୂଚନାକୁ ଗୁରୁତ୍ୱ ଦେବାକୁ ମଧ୍ୟ ଅପିଲ କରାଯାଇଛି।