ଏଣିକି UPI, ATM ଦ୍ୱାରା ସିଧାସଳଖ ଉଠାଇ ପାରିବେ PF ଟଙ୍କା !

ଦେଶର କୋଟି କୋଟି EPF (Employees’ Provident Fund) ଖାତାଧାରୀଙ୍କ ପାଇଁ ଖୁସି ଖବର । କର୍ମଚାରୀ ଭବିଷ୍ୟ ନିଧି ସଂଗଠନ (EPFO) ଶୀଘ୍ର ଏକ ନୂତନ ଡିଜିଟାଲ୍ ବ୍ୟବସ୍ଥା ଆଣିବାକୁ ଯାଉଛି, ଯାହା ମାଧ୍ୟମରେ PF ଟଙ୍କା UPI ଏବଂ ATM ଦ୍ୱାରା ସିଧାସଳଖ ଉଠାଇ ପାରିବେ। ଶ୍ରମ ଓ ନିଯୁକ୍ତି ମନ୍ତ୍ରଣାଳୟ ଏବଂ NPCI ଙ୍କ ସହଯୋଗରେ ଏହି ବ୍ୟବସ୍ଥାକୁ EPFO 3.0 ଅଧୀନରେ କାର୍ଯ୍ୟକାରୀ କରାଯିବ ।

କ’ଣ ରହିଛି ନୂଆ ସୁବିଧା?

୧. UPI ମାଧ୍ୟମରେ ତୁରନ୍ତ PF ଉଠାଣ
EPF ଖାତାଧାରୀମାନେ Google Pay, PhonePe, BHIM ପରି UPI ପ୍ଲାଟଫର୍ମ ସହ PF ଖାତାକୁ ଲିଙ୍କ୍ କରି ଆବଶ୍ୟକ ଟଙ୍କା ସିଧାସଳଖ ବ୍ୟାଙ୍କ ଆକାଉଣ୍ଟକୁ ନେଇପାରିବେ। ଫଳରେ ଦିନ ଦିନ ଧରି ଅନଲାଇନ୍ କ୍ଲେମ୍ ମଞ୍ଜୁରି ପାଇଁ ଅପେକ୍ଷା କରିବାକୁ ପଡ଼ିବ ନାହିଁ।

୨. ATM ରୁ PF ଟଙ୍କା ଉଠାଇବାର ସୁବିଧା
EPFO ଏକ ସ୍ୱତନ୍ତ୍ର PF-ଲିଙ୍କ୍ ATM କାର୍ଡ ଜାରି କରିପାରେ। ଏହି କାର୍ଡ ସାଧାରଣ ଡେବିଟ୍ କାର୍ଡ ପରି କାମ କରିବ ଏବଂ ଖାତାଧାରୀମାନେ ATM ରୁ PF ଟଙ୍କା ଉଠାଇ ପାରିବେ।

୩. EPF ବାଲାନ୍ସର ୭୫% ପର୍ଯ୍ୟନ୍ତ ଉଠାଣ
ନୂତନ ବ୍ୟବସ୍ଥା ଅନୁସାରେ, ନିଜ PF ଜମା ରାଶିର ୭୫% ପର୍ଯ୍ୟନ୍ତ ଟଙ୍କା ତୁରନ୍ତ ଉଠାଇ ପାରିବେ। ବିଶେଷକରି ଚାକିରି ହରାଇବା, ଚିକିତ୍ସା ଜରୁରୀକାଳୀନ ପରିସ୍ଥିତି କିମ୍ବା ଅନ୍ୟାନ୍ୟ ଆର୍ଥିକ ଆବଶ୍ୟକତା ସମୟରେ ଏହା ବହୁତ ସହାୟକ ହେବ।

୪. PF ବାଲାନ୍ସ ଯାଞ୍ଚ ମଧ୍ୟ ସହଜ ହେବ
UPI ଆପ୍ ମାଧ୍ୟମରେ ଖାତାଧାରୀମାନେ ନିଜ PF ବାଲାନ୍ସ ଚେକ୍ କରିପାରିବେ ଏବଂ ଟଙ୍କାକୁ ନିଜ ବ୍ୟାଙ୍କ ଖାତାକୁ ମଧ୍ୟ ଟ୍ରାନ୍ସଫର କରିପାରିବେ।

ବର୍ତ୍ତମାନ EPF ଟଙ୍କା ଉଠାଇବା ପାଇଁ ଅନଲାଇନ୍ କ୍ଲେମ୍ ଦାଖଲ କରିବାକୁ ପଡ଼େ ଏବଂ ମଞ୍ଜୁରି ପାଇଁ କିଛି ଦିନରୁ କିଛି ସପ୍ତାହ ପର୍ଯ୍ୟନ୍ତ ସମୟ ଲାଗିଥାଏ। ନୂଆ ବ୍ୟବସ୍ଥା ଲାଗୁ ହେଲେ ଏହି ପ୍ରକ୍ରିୟା କିଛି ମିନିଟ୍ ମଧ୍ୟରେ ସମ୍ପନ୍ନ ହେବାର ସମ୍ଭାବନା ରହିଛି।

କେବେ ଆରମ୍ଭ ହେବ?

EPFO ପକ୍ଷରୁ ଏହି ସୁବିଧା ଜୁନ୍ ଶେଷ ସୁଦ୍ଧା କିମ୍ବା ଖୁବ୍ ଶୀଘ୍ର ଚାଲୁ କରାଯିବା ନେଇ ସଙ୍କେତ ମିଳିଛି। ତେବେ ଏହାର ଅନ୍ତିମ ତାରିଖ ଏବଂ ସମ୍ପୂର୍ଣ୍ଣ ନିୟମାବଳୀ ସମ୍ବନ୍ଧରେ EPFO ର ଅଫିସିଆଲ ବିଜ୍ଞପ୍ତିକୁ ଅପେକ୍ଷା କରିବାକୁ ପଡ଼ିବ।

ଏଠାରେ କହି ରଖୁଛୁ ଯେ, EPFO ର ଏହି ନୂଆ ପଦକ୍ଷେପ ଲକ୍ଷାଧିକ ବେତନଭୋଗୀ କର୍ମଚାରୀଙ୍କ ପାଇଁ PF ଟଙ୍କା ଉଠାଣକୁ ଅଧିକ ସହଜ କରିବାରେ ସହାୟକ ହେବ । ଫଳରେ ଜରୁରୀ ସମୟରେ ଟଙ୍କା ପାଇବା ପାଇଁ ଆଉ ଦୀର୍ଘ ସମୟ ପର୍ଯ୍ୟନ୍ତ ଅପେକ୍ଷା କରିବାକୁ ପଡ଼ିବ ନାହିଁ।