ଗ୍ଲାସଗୋ କମନ୍‌ୱେଲଥ୍ ଗେମ୍ସର ଚାମ୍ପିଅନଙ୍କୁ ଭେଟିଲେ ପ୍ରଧାନମନ୍ତ୍ରୀ

ଗ୍ଲାସଗୋରେ ଅନୁଷ୍ଠିତ ୨୦୨୬ କମନ୍‌ୱେଲଥ୍ ଗେମ୍ସରେ ଦେଶ ପାଇଁ ପଦକ ଜିତିଥିବା ଭାରତୀୟ ଚାମ୍ପିଅନମାନଙ୍କୁ ଭେଟିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ନୂଆଦିଲ୍ଲୀର ୭ ଲୋକକଲ୍ୟାଣ ମାର୍ଗସ୍ଥିତ ତାଙ୍କ ସରକାରୀ ବାସଭବନରେ ପଦକ ବିଜେତା ଖେଳାଳିମାନଙ୍କୁ ସମ୍ବର୍ଦ୍ଧିତ କରିବା ସହ ସେମାନଙ୍କ ଉଲ୍ଲେଖନୀୟ ପ୍ରଦର୍ଶନ ପାଇଁ ଶୁଭେଚ୍ଛା ଜଣାଇଛନ୍ତି।

ଏହି ସାକ୍ଷାତକାର ସମୟରେ ପ୍ରଧାନମନ୍ତ୍ରୀ ଖେଳାଳିମାନଙ୍କ ସହ ସେମାନଙ୍କ ଅନୁଭୂତି ଓ କମନ୍‌ୱେଲଥ୍ ଗେମ୍ସର ଯାତ୍ରା ସମ୍ପର୍କରେ ଆଲୋଚନା କରିଥିଲେ। କଠିନ ପରିଶ୍ରମ, ଦୃଢ଼ ମନୋବଳ ଓ ଦେଶ ପାଇଁ ପଦକ ଜିତିବାର ଅଭିଜ୍ଞତା ଖେଳାଳିମାନେ ପ୍ରଧାନମନ୍ତ୍ରୀଙ୍କ ସହ ବାଣ୍ଟିଥିଲେ।

ଖେଳାଳିଙ୍କ ସହ ମୋଦିଙ୍କ ‘ଭିଡିଓ ରିଲ୍’

ପଦକ ବିଜେତା ଆଥଲେଟ୍‌ମାନଙ୍କ ସହ ପ୍ରଧାନମନ୍ତ୍ରୀ ମୋଦି ଏକ ଭିଡିଓ ରିଲ୍‌ ମଧ୍ୟ କରିଛନ୍ତି। ଏହି ସମୟରେ ସେ କ୍ରୀଡ଼ାର ଗୁରୁତ୍ୱ ଉପରେ ଜୋର ଦେଇ ‘ଜୋ ଖେଲେଗା, ୱୋ ଖିଲେଗା’ ବାର୍ତ୍ତା ଦେଇଛନ୍ତି। କ୍ରୀଡ଼ା କେବଳ ପଦକ ଜିତିବାର ମାଧ୍ୟମ ନୁହେଁ, ବରଂ ଯୁବପିଢ଼ିକୁ ଶୃଙ୍ଖଳା, ପରିଶ୍ରମ ଓ ଆତ୍ମବିଶ୍ୱାସର ଶିକ୍ଷା ଦେଇଥାଏ ବୋଲି ମୋଦିଙ୍କ ବାର୍ତ୍ତାରୁ ସ୍ପଷ୍ଟ ହୋଇଛି।

ପୂର୍ବରୁ ମଧ୍ୟ କମନ୍‌ୱେଲଥ୍ ଗେମ୍ସ ଆରମ୍ଭ ସମୟରେ ପ୍ରଧାନମନ୍ତ୍ରୀ ଭାରତୀୟ ଦଳକୁ ଶୁଭେଚ୍ଛା ଜଣାଇ ଖେଳାଳିମାନଙ୍କ ଦକ୍ଷତା, ଉତ୍ସର୍ଗ ଓ ପରିଶ୍ରମ ଦେଶବାସୀଙ୍କୁ ପ୍ରେରଣା ଦେଉଥିବା କହିଥିଲେ।

୩୯ ପଦକ ସହ ଚତୁର୍ଥ ସ୍ଥାନରେ ଭାରତ

ଗ୍ଲାସଗୋ କମନ୍‌ୱେଲଥ୍ ଗେମ୍ସ ୨୦୨୬ରେ ଭାରତୀୟ ଖେଳାଳିମାନେ ଦମଦାର ପ୍ରଦର୍ଶନ କରିଛନ୍ତି। ଭାରତ ମୋଟ ୩୯ଟି ପଦକ ହାସଲ କରି ମେଡାଲ୍ ତାଲିକାରେ ଚତୁର୍ଥ ସ୍ଥାନରେ ରହିଛି। ଏଥିରେ ୧୩ଟି ସ୍ୱର୍ଣ୍ଣ, ୧୭ଟି ରୌପ୍ୟ ଓ ୯ଟି ବ୍ରୋଞ୍ଜ ପଦକ ରହିଛି।

ଏହି ପ୍ରଦର୍ଶନ ଭାରତୀୟ କ୍ରୀଡ଼ା ପାଇଁ ଏକ ଗୁରୁତ୍ୱପୂର୍ଣ୍ଣ ସଫଳତା। ବିଶେଷକରି ବକ୍ସିଂ, ଜୁଡୋ, ଭାରୋତ୍ତୋଳନ ଓ ପାରା କ୍ରୀଡ଼ାରେ ଭାରତୀୟ ଆଥଲେଟ୍‌ମାନେ ଉଲ୍ଲେଖନୀୟ ସଫଳତା ହାସଲ କରିଛନ୍ତି।

ଖେଳାଳିଙ୍କ ସଫଳତାକୁ ପ୍ରଧାନମନ୍ତ୍ରୀଙ୍କ ପ୍ରଶଂସା

ପଦକ ବିଜେତାଙ୍କୁ ଭେଟିବା ସମୟରେ ମୋଦି ଖେଳାଳିମାନଙ୍କ ପରିଶ୍ରମ ଓ ଦୃଢ଼ ସଂକଳ୍ପକୁ ପ୍ରଶଂସା କରିଥିଲେ। ବିଭିନ୍ନ ଇଭେଣ୍ଟରେ ଭାରତ ପାଇଁ ପଦକ ଜିତିଥିବା ଆଥଲେଟ୍‌ମାନେ କିପରି ଚ୍ୟାଲେଞ୍ଜକୁ ସାମ୍ନା କରି ସଫଳତା ହାସଲ କଲେ, ସେ ସମ୍ପର୍କରେ ମଧ୍ୟ ଆଲୋଚନା ହୋଇଥିଲା।

ଗ୍ଲାସଗୋ ୨୦୨୬ରେ ଭାରତର ସଫଳତା ଆଗାମୀ ପିଢ଼ିର ଖେଳାଳିଙ୍କୁ ଅଧିକ ପ୍ରେରଣା ଦେବ ବୋଲି ଆଶା କରାଯାଉଛି।