CMO ଫାଇଲ ହଜିବା ଘଟଣାରେ ନୂଆ ଟ୍ୱିଷ୍ଟ ! ତଥ୍ୟ ଅପେକ୍ଷାରେ କ୍ରାଇମବ୍ରାଞ୍ଚ, ବଢ଼ିପାରେ ଚାପ

CMOରୁ ଫାଇଲ ହଜିବା ଘଟଣାର ତଦନ୍ତ କରୁଥିବା କ୍ରାଇମବ୍ରାଞ୍ଚକୁ ଏପର୍ଯ୍ୟନ୍ତ ଆବଶ୍ୟକ ତଥ୍ୟ ମିଳିନଥିବା ସୂଚନା ମିଳିଛି। ତଦନ୍ତ ପ୍ରକ୍ରିୟାକୁ ଆଗେଇ ନେବା ପାଇଁ କ୍ରାଇମବ୍ରାଞ୍ଚ ପୂର୍ବରୁ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ (CMO), ଗୃହ ବିଭାଗ ଏବଂ ମୁଖ୍ୟ ଶାସନ ସଚିବଙ୍କ କାର୍ଯ୍ୟାଳୟକୁ କିଛି ନିର୍ଦ୍ଦିଷ୍ଟ ତଥ୍ୟ ଓ ଦଲିଲ ମାଗିଥିଲା। କିନ୍ତୁ ଏପର୍ଯ୍ୟନ୍ତ ସେହି ସମସ୍ତ ତଥ୍ୟ ତଦନ୍ତକାରୀ ସଂସ୍ଥା ପାଖକୁ ପହଞ୍ଚିନଥିବା ଜଣାପଡ଼ିଛି।

କ୍ରାଇମବ୍ରାଞ୍ଚ ମୁଖ୍ୟାଳୟ ସୂତ୍ରରୁ ମିଳିଥିବା ସୂଚନା ଅନୁସାରେ, ଚାହିଁଥିବା ତଥ୍ୟ ନମିଳିବାରୁ ତଦନ୍ତ ପ୍ରକ୍ରିୟା ପ୍ରଭାବିତ ହେଉଛି। ଏହି କାରଣରୁ ସମ୍ପୃକ୍ତ କାର୍ଯ୍ୟାଳୟ ଗୁଡ଼ିକୁ ପୁଣିଥରେ ସାନି ନୋଟିସ୍‌ ଜାରି କରାଯାଇପାରେ ବୋଲି ସୂତ୍ରରୁ ସୂଚନା ମିଳିଛି।

ସୂଚନା ଅନୁଯାୟୀ, ତଦନ୍ତରେ ଆବଶ୍ୟକ ଫାଇଲ ସମ୍ବନ୍ଧୀୟ ଦଲିଲ, ଅଫିସିଆଲ୍ ରେକର୍ଡ ଓ ଅନ୍ୟାନ୍ୟ ସଂପୃକ୍ତ ତଥ୍ୟ କ୍ରାଇମବ୍ରାଞ୍ଚ ପକ୍ଷରୁ ମଗାଯାଇଥିଲା। ସେଗୁଡ଼ିକ ମିଳିଲେ ଘଟଣାର ପ୍ରକୃତ କାରଣ ଏବଂ ଫାଇଲ ହଜିବାର ପରିସ୍ଥିତିକୁ ନେଇ ତଦନ୍ତକୁ ଅଧିକ ଗତି ମିଳିପାରିବ।

ତେବେ ଏହି ପ୍ରସଙ୍ଗରେ ସମ୍ପୃକ୍ତ ବିଭାଗ ପକ୍ଷରୁ ଏପର୍ଯ୍ୟନ୍ତ କୌଣସି ଆଧିକାରିକ ପ୍ରତିକ୍ରିୟା ସାମ୍ନାକୁ ଆସିନାହିଁ। ଅନ୍ୟପଟେ, କ୍ରାଇମବ୍ରାଞ୍ଚ ଆଇନ ଅନୁଯାୟୀ ପରବର୍ତ୍ତୀ ପଦକ୍ଷେପ ନେଇପାରେ ବୋଲି ଜଣାପଡ଼ିଛି। ତଦନ୍ତର ସ୍ୱାର୍ଥରେ ଆବଶ୍ୟକ ତଥ୍ୟ ଶୀଘ୍ର ପ୍ରଦାନ କରିବାକୁ ସମ୍ପୃକ୍ତ କାର୍ଯ୍ୟାଳୟଗୁଡ଼ିକୁ ପୁଣି ନୋଟିସ୍‌ ପଠାଯିବାର ସମ୍ଭାବନା ରହିଛି।