ପହଣ୍ଡି ବେଳେ କାହିଁକି ଖୋଲାଗଲା ମହାପ୍ରଭୁଙ୍କ ଟାହିଆ ? ସାମ୍ନାକୁ ଆସିଲା ବଡ଼ କାରଣ !

ବିଶ୍ୱପ୍ରସିଦ୍ଧ ପବିତ୍ର ରଥଯାତ୍ରାରେ ପହଣ୍ଡି ବିଜେ ସମୟରେ ମହାପ୍ରଭୁ ଶ୍ରୀଜଗନ୍ନାଥଙ୍କ ମସ୍ତକରେ ପାରମ୍ପରିକ ଟାହିଆ ନ ଥିବା ଘଟଣାକୁ ନେଇ ଭକ୍ତମାନଙ୍କ ମନରେ ବିଭିନ୍ନ ପ୍ରଶ୍ନ ସୃଷ୍ଟି ହୋଇଥିଲା। ଏହି ପ୍ରସଙ୍ଗରେ ଦଇତାପତି ନିଯୋଗ ସମ୍ପାଦକ ରାମକୃଷ୍ଣ ଦାସମହାପାତ୍ର ସ୍ପଷ୍ଟୀକରଣ ଦେଇଛନ୍ତି।

ତାଙ୍କ କହିବା ଅନୁସାରେ, ପହଣ୍ଡି ବେଳେ ପ୍ରବଳ ବର୍ଷା ହେବାରୁ ମହାପ୍ରଭୁଙ୍କ ଟାହିଆ ପାଣିରେ ଭିଜି ଅତ୍ୟଧିକ ଭାରି ହୋଇଯାଇଥିଲା। ଏହାର ଓଜନ ବଢ଼ିଯିବା ଫଳରେ ପହଣ୍ଡି ନୀତି ସୁରୁଖୁରୁରେ ସମ୍ପନ୍ନ କରିବା କଷ୍ଟସାଧ୍ୟ ହୋଇପଡ଼ିଥିଲା।

ସେଥିପାଇଁ ସେବାୟତମାନେ ପରମ୍ପରା ଓ ନୀତିକୁ ସମ୍ମାନ ଦେଇ ଏବଂ ମହାପ୍ରଭୁଙ୍କ ପହଣ୍ଡି ସୁରକ୍ଷିତ ଭାବେ ସମ୍ପନ୍ନ କରିବା ଉଦ୍ଦେଶ୍ୟରେ ଟାହିଆକୁ ଖୋଲି ଦେଇଥିଲେ। ଯଦି ଟାହିଆ ଖୋଲାଯାଇନଥାନ୍ତା, ତେବେ ଅତ୍ୟଧିକ ଓଜନ କାରଣରୁ ମହାପ୍ରଭୁଙ୍କୁ ରଥ ଉପରକୁ ପହଞ୍ଚାଇବାରେ ଅସୁବିଧା ସୃଷ୍ଟି ହୋଇଥାନ୍ତା ।

ଦଇତାପତି ନିଯୋଗ ପକ୍ଷରୁ ସ୍ପଷ୍ଟ କରାଯାଇଛି ଯେ, ଏହା କୌଣସି ପରମ୍ପରାର ବ୍ୟତିକ୍ରମ ନୁହେଁ, ବରଂ ପ୍ରବଳ ବର୍ଷାରେ ସୃଷ୍ଟି ହୋଇଥିବା ବିଶେଷ ପରିସ୍ଥିତିକୁ ଦୃଷ୍ଟିରେ ରଖି ନୀତି-ନିୟମ ଅନୁଯାୟୀ ଏହି ନିଷ୍ପତ୍ତି ନିଆଯାଇଥିଲା। ଏହାଦ୍ୱାରା ମହାପ୍ରଭୁଙ୍କ ପହଣ୍ଡି ନୀତି ନିର୍ବିଘ୍ନରେ ସମ୍ପନ୍ନ ହୋଇ ରଥାରୋହଣ ସଫଳ ହୋଇଥିଲା।