ସୁଜାତାଙ୍କ ହାତରେ ବିଜେଡିର ଭବିଷ୍ୟତ !

ଭି.କେ. ପାଣ୍ଡିଆନଙ୍କ ପତ୍ନୀ ସୁଜାତା କାର୍ତ୍ତିକେୟନ ବିଜୁ ଜନତା ଦଳ (ବିଜେଡି)ରେ ଔପଚାରିକ ଭାବେ ସାମିଲ ହେବା ପରେ ଦଳ ଭିତରେ ଅସନ୍ତୋଷର ସ୍ୱର ଶୁଣିବାକୁ ମିଳିଥିଲା। ସୁଜାତାଙ୍କ ଯୋଗଦାନକୁ କେନ୍ଦ୍ର କରି ଦଳର କିଛି ବରିଷ୍ଠ ନେତା ଖୁସି ନଥିବା ନେଇ ରାଜନୈତିକ ମହଲରେ ବ୍ୟାପକ ଚର୍ଚ୍ଚା ହୋଇଥିଲା। ଏହାର ପ୍ରମୁଖ କାରଣ ଥିଲା ତାଙ୍କ ଯୋଗଦାନ କାର୍ଯ୍ୟକ୍ରମରେ ବିଜେଡିର କିଛି ପ୍ରମୁଖ ଓ ବରିଷ୍ଠ ନେତାଙ୍କ ଅନୁପସ୍ଥିତି। ଏହି ଅନୁପସ୍ଥିତିକୁ ନେଇ ବିଭିନ୍ନ ପ୍ରକାର କଳ୍ପନାଜଳ୍ପନା ଆରମ୍ଭ ହୋଇଥିଲା। ଅନେକଙ୍କ ମତରେ, ଏହା ଦଳ ଭିତରେ ଥିବା ମତଭେଦର ସଙ୍କେତ ଥିଲା।

କିନ୍ତୁ ଘଟଣାକ୍ରମ ଖୁବ ଶୀଘ୍ର ବଦଳିଯାଇଥିଲା। ସୁଜାତା କାର୍ତ୍ତିକେୟନଙ୍କ ଯୋଗଦାନର ପରଦିନ ଶଙ୍ଖ ଭବନରେ ତାଙ୍କ ସହ ବିଜେଡିର ବରିଷ୍ଠ ନେତା ପ୍ରଣବ ପ୍ରକାଶ ଦାସ (ବବି)ଙ୍କ ଭେଟଘାଟ ହୋଇଥିଲା। ଏହି ସାକ୍ଷାତକାର ପରେ ଦଳ ଭିତରେ ଯେଉଁ ଅସନ୍ତୋଷ କିମ୍ବା ବିଶୃଙ୍ଖଳା ନେଇ ଆଲୋଚନା ହେଉଥିଲା, ତାହା ଧୀରେ ଧୀରେ ଶାନ୍ତ ପଡ଼ିଥିବା ଚିତ୍ର ଦେଖିବାକୁ ମିଳିଛି। ଏହାପରେ ଦଳ ଏକଜୁଟ ଥିବାର ବାର୍ତ୍ତା ଦେବାକୁ ନେତୃତ୍ୱ ପକ୍ଷରୁ ଚେଷ୍ଟା କରାଯାଇଥିବା ରାଜନୈତିକ ପର୍ଯ୍ୟବେକ୍ଷକମାନେ ମତ ପ୍ରକାଶ କରୁଛନ୍ତି।

ଏହା ମଧ୍ୟରେ ରାଜନୈତିକ ମହଲରେ ଏପରି ଚର୍ଚ୍ଚା ଜୋର ଧରିଛି ଯେ, ଦଳର ସାଂଗଠନିକ ଦାୟିତ୍ୱରେ ସୁଜାତା କାର୍ତ୍ତିକେୟନଙ୍କ ଭୂମିକା ଆଗାମୀ ଦିନରେ ଅଧିକ ବଢ଼ିପାରେ। ସୋସିଆଲ ମିଡିଆ ଓ ରାଜନୈତିକ ଆଲୋଚନାରେ ଏପରି ଦାବି ମଧ୍ୟ ଶୁଣିବାକୁ ମିଳୁଛି ଯେ, ଦଳର ଭବିଷ୍ୟତ ସଂଗଠନକୁ ନେଇ ସୁଜାତାଙ୍କୁ ଗୁରୁତ୍ୱପୂର୍ଣ୍ଣ ଭୂମିକା ଦିଆଯାଇପାରେ। ତେବେ ଏହାକୁ ନେଇ ବିଜେଡି ପକ୍ଷରୁ କୌଣସି ଔପଚାରିକ ଘୋଷଣା କରାଯାଇନାହିଁ।

ଦଳ ବିରୋଧୀ କାର୍ଯ୍ୟକଳାପକୁ ବରଦାସ୍ତ କରାଯିବ ନାହିଁ ଏବଂ ଯେଉଁମାନେ ଦଳର ଶୃଙ୍ଖଳା ଭଙ୍ଗ କରିବେ, ସେମାନଙ୍କ ବିରୋଧରେ ଦଳ ଆବଶ୍ୟକ ପଦକ୍ଷେପ ନେବ। ବିଜେଡି ଏକ ଶକ୍ତିଶାଳୀ ଆଞ୍ଚଳିକ ଦଳ ଭାବେ ଆଗକୁ ମଧ୍ୟ ରହିବ ବୋଲି ପ୍ରଣବ ପ୍ରକାଶ ଦାସ କହିଥିବା ସୂଚନା ମିଳିଛି ।

ଏପଟେ ବିଜେଡି ସଭାପତି ନବୀନ ପଟ୍ଟନାୟକ ମଧ୍ୟ ଦଳର ଭବିଷ୍ୟତକୁ ନେଇ ସ୍ପଷ୍ଟ ସନ୍ଦେଶ ଦେଇଛନ୍ତି। ଗଣମାଧ୍ୟମକୁ ସେ କହିଛନ୍ତି ଯେ, ତାଙ୍କ ନେତୃତ୍ୱରେ ବିଜେଡି ୨୦୨୯ ନିର୍ବାଚନ ଲଢ଼ିବ। ଏହି ବୟାନ ପରେ ଦଳର ନେତୃତ୍ୱକୁ ନେଇ ଚାଲିଥିବା ବିଭିନ୍ନ ଆଲୋଚନା ଉପରେ ବିରାମ ଲାଗିଥିବା ଦେଖାଯାଇଛି।

ତେବେ ନବୀନ ପଟ୍ଟନାୟକଙ୍କ ପରେ ଦଳର ନେତୃତ୍ୱ କିଏ ନେବେ, ସେ ପ୍ରଶ୍ନକୁ ନେଇ ରାଜନୈତିକ ମହଲରେ ଏବେ ମଧ୍ୟ ଚର୍ଚ୍ଚା ଜାରି ରହିଛି। କେତେକ ବିଶ୍ଲେଷକ ଓ ଦଳୀୟ କର୍ମୀଙ୍କ ମଧ୍ୟରେ ସୁଜାତା କାର୍ତ୍ତିକେୟନଙ୍କ ନାମକୁ ନେଇ ଆଲୋଚନା ହେଉଥିବା ଦେଖାଯାଉଛି। ତେବେ ଏହା କେବଳ ରାଜନୈତିକ ଚର୍ଚ୍ଚା ଓ କଳ୍ପନାଜଳ୍ପନାର ସ୍ତରରେ ରହିଛି। ବିଜେଡି ପକ୍ଷରୁ ଏପର୍ଯ୍ୟନ୍ତ ଏନେଇ କୌଣସି ଔପଚାରିକ ଘୋଷଣା କିମ୍ବା ସ୍ପଷ୍ଟ ସଙ୍କେତ ମିଳିନାହିଁ।